राज्यात विधानसभा निवडणुकीनंतर नगरपालिका, नगर परिषद आणि महापालिकांच्या निवडणूका पार पडल्या, या निवडणुकांमध्ये देखील भाजपला मोठं यश मिळालं होतं. भाजप हा राज्यात सर्वात मोठा पक्ष ठरला होता, तर या निवडणुकीमध्ये शिवसेना शिंदे गट हा दुसऱ्या क्रमांकाचा पक्ष ठरला. मात्र या निवडणुकीमध्ये भाजपकडून शिवसेना शिंदे गटाची डोकेदुखी वाढवण्यात आली होती. स्थानिक स्वराज्य संस्थांच्या निवडणुकांमध्ये काही ठिकाणी भाजप आणि शिवसेना शिंदे गटाने युती केली होती, तर काही ठिकाणी दोन्ही पक्षाने वेगवेगळ्या निवडणुका लढवल्याचं पहायला मिळालं. दरम्यान जिथे-जिथे युती झाली नाही, तिथे-तिथे भाजपकडून शिवसेना शिंदे गटाचे अनेक संभाव्य उमेदवार फोडण्यात आल्याचं पहायला मिळालं, तसेच शिवसेना शिंदे गटाकडून ज्यांना तिकीट मिळालं नाही, त्यांनी देखील भाजपमध्ये प्रवेश केला. याचा मोठा फटका हा शिवसेना शिंदे गटाला बसला होता. यावरून शिवसेना शिंदे गटाकडून नाराजी व्यक्त करण्यात आली होती.
दरम्यान आता पुन्हा एकदा राजकीय वर्तुळातून मोठी बातमी समोर येत आहे, ती म्हणजे पुण्यात भाजपने शिवसेना शिंदे गटाला धक्का दिला आहे. कसब्यात शिवसेना शिंदे गटाला खिंडार पडलं आहे. कसब्यातील शिवसेना शिंदे गटाचे पदाधिकारी आज भाजपमध्ये प्रवेश करणार आहेत. पुण्याच्या कसब्यामधील शिवसेना शिंदे गटाचे नेते रवींद्र धंगेकर यांच्यासाठी हा मोठा धक्का मानला जात आहे. वैष्णवी किराड यांच्यासह शिवसेना शिंदे गटाचे अनेक पदाधिकारी भाजपमध्ये प्रवेश करणार आहेत. यावर आता रवींद्र धंगेकर यांची पहिली प्रतिक्रिया समोर आली आहे.
नेमकं काय म्हणाले धंगेकर?
कोणी आले न आले तरी धंगेकर एकटा बास आहे. एकटा धंगेकर सगळ्यांना बास आहे, मला काय कोणाची मदत लागत नाही. मी कार्यकर्त्यांना कार्यकर्त्यांच्या जागी ठेवतो, त्यांचं भविष्य आहे, त्यांना काम करायचं आहे. तुम्ही पाहिलं असेल मी माझ्या राजकारणात कोणाला बरोबर घेत नाही, इथे एकटा धंगेकर बास आहे, अशी यावर प्रतिक्रिया रवींद्र धंगेकर यांनी दिली आहे.
प्रतिक्रिया द्या